ភ្នំពេញ៖ ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋឥណ្ឌាបង្ហាញការគាំទ្រឱ្យមានកិច្ចព្រមព្រៀងពាណិជ្ជកម្មសេរី ដើម្បីជំរុញកិច្ចសហប្រតិបត្តិការរវាងប្រទេសទាំងពីរ ឆ្លើយតបទៅនឹងសំណើរបស់ឧបនាយករដ្ឋមន្ត្រីនៃព្រះរាជាណាចក្រកម្ពុជា។
នៅក្នុងឱកាសឯកអគ្គរដ្ឋទូតនៃសាធារណរដ្ឋឥណ្ឌាលោកស្រី ដេវីយ៉ានី ខូប្រាហ្កាដ ចូលជួបសម្ដែងការគួរសមនៅទីស្តីការគណៈរដ្ឋមន្ត្រីនៅថ្ងៃទី៩ ខែមីនា ឆ្នាំ២០២២នេះ ឧបនាយករដ្ឋមន្ត្រី ហោ ណាំហុង បានលើកឡើងថា កិច្ចសហប្រតិបត្តិការពាណិជ្ជកម្មប្រទេសទាំងពីរ នៅមានកំរិតតិចតួចនៅឡើយ ដែលគួរតែពិចារណាឱ្យមានកិច្ចព្រមព្រៀងពាណិជ្ជកម្មសេរី ដើម្បីបង្កើនកិច្ចសហប្រតិបត្តិការនៃប្រទេសទំាងពីរ។
ជាមួយគ្នានេះ ឯកអគ្គរដ្ឋទូតនៃសាធារណរដ្ឋឥណ្ឌាបានបង្ហាញពីគាំទ្រឲ្យមានកិច្ចព្រមព្រៀងពាណិជ្ជកម្មសេរី (FTA) រវាងកម្ពុជា-ឥណ្ឌា ដើម្បីជំរុញកិច្ចសហប្រតិបត្តិការ ឱ្យកាន់តែមានភាពជិតស្និទ្ធ និងស៊ីជម្រៅថែមទៀត។
លោកឧបនាយករដ្ឋមន្ត្រី ហោ ណាំហុង ក៏បានលើកឡើង អំពីទំនាក់ទំនងទ្វេភាគីកម្ពុជា-ឥណ្ឌា ដែលនឹងគម្រប់៧០ឆ្នាំ នៅខែឧសភាខាងមុខនេះ ដោយថាក្នុងរយៈពេល៧០ឆ្នាំនេះ ទំនាក់ទំនងមិត្តភាព និងកិច្ចសហប្រតិបត្តិការបានល្អប្រសើរលើគ្រប់វិស័យ។
ក្នុងនាមរាជរដ្ឋាភិបាលកម្ពុជា លោកក៏បានថ្លែងអំណរគុណដល់រដ្ឋាភិបាលឥណ្ឌា ដែលបានផ្តល់ជំនួយដល់កម្ពុជា ក្នុងការជួសជុលប្រាសាទតាព្រហ្មតំាងពីឆ្នាំ២០០៤ ការផ្ដល់ម៉ាស៊ីនបូមទឹក ការដោះមីន ព្រមទាំងអាហារូបករណ៍ដល់និស្សិត និងមន្រ្តីរាជការកម្ពុជា ព្រមទាំងកម្ចីឥតសំណងផ្សេងៗទៀត៕